மோடியிடமும் ஜெயலலிதாவிடமும் அரசாங்கம் மன்னிப்பு கோரியமை இலங்கைக்கு தலைகுனிவு
http://newsweligama.blogspot.com/2014/08/blog-post_8.html
இந்தியப் பிரதமர் மோடியிடமும் ஜெயலலிதாவிடமும் அரசாங்கம் மன்னிப்புக் கோரியமையானது எமது தாய்நாடான இலங்கையை தலைகுனியச் செய்த – நாட்டுக்கு அபகீர்த்தியை ஏற்படுத்திய சம்பவமாகும் என ஜனநாயக தேசியக் கூட்டணியின் பாராளுமன்ற உறுப்பினரும் ஜே.வி.பி.யின் தலைவருமான அநுரகுமார திஸாநாயக நேற்று சபையில் குற்றம் சாட்டினார்.
வாஷிங்டனுடன் இரகசியத் தொடர்புகளை அரசாங்கமும் பேணிவருகிறது. எனவே தான் இஸ்ரேலின் பாலஸ்தீனத்துக்கு எதிரான காட்டுமிராண்டித் தாக்குதல்களை கண்டிக்காது
நழுவல் போக்கே கடைப்பிடிக்கப்படுவதாகவும் அவர் சபையில் தெரிவித்தார்.
பாராளுமன்றத்தில் நேற்று புதன்கிழமை வெளிவிவகார அமைச்சு தொடர்பில் சபை ஒத்திவைப்பு பிரேரணையை முன்வைத்து உரையாற்றும் போதே அனுர குமாரா திஸாநாயக்க எம்.பி. இதனைத் தெரிவித்தார்.
அவர் சபையில் தொடர்ந்து உரையாற்றுகையில்;
பாதுகாப்பு அமைச்சின் இணையத்தளம் என்பது நாட்டின் தேசிய பாதுகாப்புடன் தொடர்புபட்ட நாட்டுத் தலைவரின் கண்காணிப்பு உள்ள முக்கிய இணையத் தளமாகும். அவ்வாறானதொரு வெப் தளத்தினூடாக இந்தியப் பிரதமர் மோடி மற்றும் ஜெயலலிதாவை கொச்சைப் படுத்தி கேலிச் சித்திரம் வெளியிடப்பட்டது.
இது எவ்வாறு நிகழ்ந்தது? இச் சம்பவமானது இரண்டு பேர்களை அல்ல ஒரு நாட்டை கொச்சைப்படுத்தியமைக்கு சமாந்தரமாகும்.
இறுதியில் என்ன நடந்தது? அரசாங்கம் மோடியிடமும் ஜெயலலிதாவிடமும் மன்னிப்பு கோரியது.
இது அரசாங்கத்திற்கு பிரச்சினையல்ல. ஆனால் எமது தாய் நாடான இலங்கையை தலைகுனியச் செய்து அபகீர்த்தியை ஏற்படுத்திய சம்பவமாகும்.
உள்நாட்டில் அமெரிக்காவுக்கு எதிராக கடுமையான கருத்துக்களை வெளியிட்டு தோலுரிக்கும் அரசாங்கம் இரகசியமாக வாஷிங்டனுடன் தொடர்புகளை பேணி வருகின்றது.
அமெரிக்காவின் பல நிறுவனங்களிடமிருந்து பணத்தை கொடுத்து ஆலோசனைகள் பெறப்படுகின்றன.
பாலஸ்தீனத்தின் நண்பர்கள் என அரசாங்கம் கூறிக்கொள்கின்றது. ஆனால் வாஷிங்டனிடம் மண்டியிட்டுள்ள அரசாங்கம் இஸ்ரேலின் மொஸாட் பாலஸ்தீனத்தில் செய்யும் அட்டூழியங்களுக்கு எதிர்ப்பு தெரிவிக்காது அதனை எதிர்த்து பிரேரணை எதனையும் நிறைவேற்றாது நழுவல் போக்கை கடைப்பிடிக்கின்றது.
அரசாங்கம் நியமித்த காணாமல் போனோர் விசாரணை ஆணைக் குழுவிற்கு ஆலோசனைகளை வழங்க மூவரடங்கிய வெளிநாட்டு நிபுணர்களை அரசு நியமித்துள்ளது.
இது வாஷிங்டனின் அழுத்தம் காரணமாகவே இடம்பெற்றது.
இந்த நிபுணர்களுக்கு அதாவது ஒருவருக்கு கொடுப்பனவாக ரூபா 6 1ஃ2 கோடி வழங்கப்படவுள்ளதாக அறிய வருகிறது. இது தொடர்பில் அரசாங்கத்தின் பதில் என்ன?
பாலஸ்தீனத்தின் நண்பர்கள் எனக் கூறிக் கொள்ளும் அரசாங்கம் இஸ்ரேல் - பாலஸ்தீன பிரச்சினை தொடர்பிலான தற்போதைய தனது நிலைப்பாட்டை அறிவிக்க வேண்டும்.
இன்று வெளிவிவகார அமைச்சு ஸ்ரீலங்கா சுதந்திரக் கட்சியின் கிளைச் சங்கமாக மாறி விட்டதோடு அரசாங்க தரப்பினரின் உறவினர்களின் கூடாரமாக மாறி விட்டது.
இலங்கைக்கான தூதுவர்களாக வெளிநாடுகளில் 49 பேர் நியமிக்கப்பட்டுள்ளனர்.
இவர்களில் 14 பேர் மட்டுமே வெளிநாட்டலுவல்கள் தொடர்பான கற்கை நெறிகளை மேற்கொண்ட திறமையானவர்கள் ஆவார்கள்.
ஏனையோர் அனைவரும் ஸ்ரீலங்கா சுதந்திரக் கட்சியின் அமைப்பாளர்கள் பதவி வகித்தவர்கள் அரசாங்க உயர் மட்டத்தினரின் நெருங்கிய உறவினர்கள். சகோதரர்கள் மட்டுமல்லாது அமைச்சர்களின் சகோதரர்கள் உறவினர்கள் என அரசியல் ரீதியானவர்களே தூதுவர்களாகவும் தூதரகங்களின் செயலாளர்களாகவும் அதிகாரிகளாகவும் நியமிக்கப்பட்டுள்ளனர்.
அரசின் சர்வதிகாரம் மனித உரிமை மீறல்களை பயன்படுத்தி அமெரிக்கா உட்பட மேற்குலக நாடுகள் இலங்கைக்கு எதிரான நிகழ்ச்சி நிரலை தயாரித்து அதனை நடைமுறைப்படுத்தி வருகிறது.
எமது நாட்டை உலகிலிருந்து தனிமைப்படுத்தி ஓரங்கட்ட திடசங்கற்பம் பூண்டு செயல்படுகின்றது. ஆனால் எமது நாட்டுக்கு எதிரான வெளிநாட்டு சக்திகளின் சவால்களுக்கு முகம் கொடுத்து வெற்றி பெறக்கூடிய திறமையானவர்கள் வெளிநாட்டு சேவையில் இல்லை.
எனவே இவ்வாறானவர்களுக்கு கடிதங்களை கோரிக்கைகளை எழுதிக்கொடுக்கவும் உரைகளை எழுதிக் கொடுக்கவும் பல கோடி ரூபாய் செலவில் அமெரிக்காவில் பல நிறுவனங்கள் நியமிக்கப்பட்டுள்ளன.
உள்நாட்டில் அமெரிக்காவை விமர்சிக்கும் அரசாங்கம் இரகசியமாக தொடர்புகளை பேணி வருகின்றது. நவீன தகவல் தொழில்நுட்பம் பொருளாதாரம் போக்குவரத்து என பல துறைகளிலும் உலகம் சுருங்கி வருகிறது. நாடுகளுக்கிடையேயான இடைவெளிகளை குறைத்து உலகசந்தையும் ஓரிடத்திற்குள் வந்து சேர்ந்துள்ளது.
ஆனால் எமது வெளிவிவகார சேவை எங்கு செல்கிறது? திறமையற்றவர்களினதும் தேயிலை வியாபாரிகளினதும் நிதி மோசடிக்காரர்கள் கருக்கலைப்புக்களை மேற்கொள்ளும் திறமையற்றவர்களின் கூடாரமாக மாறிக்கொண்டுள்ளது.
வெளிவிவகார அமைச்சின் பேராசிரியர் சிறந்த கல்வி மான். தான் சார்ந்துள்ள அரசாங்கத்தை பாதுகாப்பதற்காக சிங்கள விதானங்களை திறமையாக பயன்படுத்தக் கூடியவர்.
ஆனால் இன்று வெளிவிவகார அமைச்சரிடமிருந்து வெளிவிவகார சேவை தொடர்பிலான அதிகாரங்கள் பறிக்கப்பட்டுள்ளது.
அவை திறமையற்றவர்களின் கைகளில் சிறைக் கைதியாகியுள்ளன. வெளிவிவகார அமைச்சர் ஜீ.எல். இன்று ஸ்ரீலங்கா சுதந்திரக் கட்சியின் மேடைப் பேச்சாளராக மாறிவிட்டார்.
மறைந்த வெளிவிவகார அமைச்சர் லக் ஷ்மன் கதிர்காமர் இவ்வாறு மாறவில்லை. அவர் தனது அமைச்சுப் பதவியை நாட்டுக்காக திறமையாக பயன்படுத்தினார்.
அமைச்சர்கள் தமது பிள்ளைகளை மாகாண சபைகளுக்கு அனுப்புவது போன்று வெளிநாட்டு சேவைகளுக்குள் புகுத்தி அரசியல் மயமாக்கியுள்ளனர்.
அத்தோடு வெளிநாட்டு தூதரகங்களில் திறமையாக பணியாற்றிய அனுபவசாலிகளை தமிழ் மற்றும் சிங்கள முஸ்லிம் அதிகாரிகளில் கொழும்புக்கு இடமாற்றம் செய்யப்பட்டு கொழும்பில் வெளிவிவகார அமைச்சுக்குள் வரையறுக்கப்பட்டுள்ளனர். ஏன் வெளிநாட்டு சேவையை இவ்வாறு சீர்குலைக்கின்றீர்கள்?
பொதுநலவாய நாடுகள் அமைப்பின் பொறுப்பு மிக்க முக்கிய பதவியான தலைமைப் பதவியை ஜனாதிபதி மஹிந்த ராஜபக் ஷ வகிக்கின்றார். ஆனால் அவ்வாறான முக்கிய பதவியை வகிக்கும் ஜனாதிபதி அதன் முக்கிய நிகழ்ச்சியான பொதுநலவாய நாடுகளின் விளையாட்டுப் போட்டிகளில் கலந்து கொள்ளவில்லை. ஏனென்றால் பாதுகாப்பு பிரச்சினை என அரசு கூறுகிறது என்றும் அநுர திஸாநாயக்க எம்.பி. தெரிவித்தார்.
