முடிந்தால் எம்முடன் மோதி வெல்லட்டும் - ஞானசார
http://newsweligama.blogspot.com/2014/08/blog-post_645.html
கேள்வி :- தன்னை அவமதித்தமைக்காக 10 மில்லியன் நஷ்ட ஈடு கோரி அமைச்சர் ராஜித சேனாரத்ன உங்களுக்கு எதிராக வழக்கு தாக்கல் செய்யவுள்ளதாக தெரிவித்துள்ளார். இதற்கு உங்களின் பதில் என்ன?
பதில்: அமைச்சர் ராஜித சேனாரத்னவிற்கு வழக்கு தொடர்வதற்கான உரிமை உள்ளது. அதில் எவ்வித தடைகளையும் எம்மால் விதிக்க முடியாது. எனினும் எமக்கு உரிமை உள்ளது. இந்த நாட்டில் நடக்கும் அநியாயங்களை தட்டி கேட்பதற்கு. அதையே நாம் செய்து வருகின்றோம். நாம் காவியுடைய அணிந்த அடாவடிக்காரர்கள் என அமைச்சர் ராஜித சொல்கின்றார். நாம் காவியுடையினை அணிந்தமையினாலேயே இவர்கள் செய்யும் அட்டூழியங்களை வெளிக்கொண்டு வர முடிகின்றது. இந்த காவி இருப்பதனால்தான் எவருக்கும் அஞ்சாது செயற்பட முடிகின்றது.
எமக்கு எதிராக அமைச்சர் வழக்கு தாக்கல் செய்வது அவரின் உரிமை. அதேபோல் ராஜித செய்த ஊழல்கள் தொடர்பிலான அனைத்து ஆதாரங்களும் எம்மிடம் உள்ளன. அவை அனைத்தையும் நாம் முன் வைப்போம். அதேபோல் நாம் நியாயமாக போராடுகின்றோம். எனவே எம்முடன் மோதி அவர்களால் சாதிக்க முடியாது. முடியுமானால் எம்மிடமிருந்து இவர்கள் ஒரு ரூபாயேனும் பெற்றுக்காட்டட்டும். அது அமைச்சர் ராஜித் சேனாரத்னவிற்கு நான் விடுக்கும் சவாலாகும்.
கேள்வி : பொதுபலசேனா அமைப்பினை தடை செய்து உங்களை சட்டத்தின் முன் நிறுத்த வேண்டும் என தவ்ஹித் ஜமாஅத் எனும் இஸ்லாம் அமைப்பு தெரிவித்துள்ளது. இது தொடர்பில் உங்களின் கருத்து என்ன?
பதில்: எமது இயக்கத்தை தடை செய்து என்னை சட்டத்தின் முன் நிறுத்த தவ்ஹித் ஜமா அத் அமைப்பு கோரிக்கை விடுக்க முன்னர் இவர்களை கைது செய்ய வேண்டும். இலங்கையில் முஸ்லிம் தீவிரவாதமொன்று உருவாவதே இவ்இஸ்லாமிய அமைப்பினரால்தான். சிங்கள பௌத்த இனத்திற்கு அழிவு ஏற்படுமென்றால் அது தவ்ஹித் ஜமா அத் அமைப்பினால் தான் ஏற்படும். அதற்கு முன்னர் அவர்களை சட்டத்தின் முன் நிறுத்த வேண்டும்.
இவர்களின் நினைப்பானது சவூதி அரேபியாவின் இஸ்லாமிய கொள்கையினை இலங்கையில் பரப்பி இஸ்லாமிய தேசமொன்றினை உருவாக்க முடியும் என்பதேயாகும். நாம் ஒன்றை தெளிவாக கூறுகின்றோம். இலங்கை சவூதி அரஏபியா அல்ல என்பதை. தவ்ஹித் ஜமா அத் அமைப்பினர் நினைவில் வைத்துக்கொள்ள வேண்டும். அதேபோல் கடந்த சில தினங்களுக்கு முன்னர் இனவாத குறுஞ்செய்தி அனுப்பி இன முரண்பாட்டினை செய்ய முயற்சித்ததன் பின்னணியில் தவ்ஹீத் ஜமா அத்தை சேர்ந்த சிலர் இருக்கின்றனர் என்பதே உண்மை. இவர்களே முஸ்லிம்களை தூண்டிவிட்டு கலவரத்தை உருவாக்க முயற்சிக்கின்றனர்.
அளுத்கம சம்பவத்தின் பின்னணியில் இவர்கள் செயற்பட்டதன் காரணத்தினாலேயே சிங்கள முஸ்லிம் கலவரமொன்று உருவாக்கப்பட்டது. அதேபோல் இன்று இவர்கள் தொடர்ச்சியாக இவ்வாறான இன முரண்பாட்டினை உருவாக்க முயற்சிப்பார்களாக இருப்பின் நாமே இதற்கு முற்றுப்புள்ளி வைக்க வேண்டிய நிலை உருவாகும் எனவும் தெரிவித்தார்.
